Ka Sorkar kan tei da ka Fly Over bad Skywalk ban pynkylluid ïa ka Shillong

May 14, 2019 0 By Lurphira Lurphira

Shillong, May 14, 2019 : Ka Sorkar Meghalaya Democratic Alliance (MDA) ka don jingthmu mynta ban tei noh da k ‘Fly Over’ bad ka ‘Skywalk’ na ka bynta ban wanrah ïa ka jingkylluid hapoh ka Nongbah Shillong.Haba iathuh ïa kane, u Myntri kam pynroi sor Bah Hamletson Dohling ula ong, ka Tnad kala pynlong ïa ka jinpeit bniah (survey) na ka bynta ban tei ïa ka ‘fly over na Bivar Road sha Polo, marjan bad ka ktem ki CRPF.

U Bah Hamlet u pyntip ba ka jingtyrwa kaba rim ban shna ïa ka fly over na Rap’s Mansion, IGP sha Them Metor, la hap ban pynsangeh noh shuwa namar ka jingpyrshah kaba mih na ka Ïingkashari Meghalaya High Court bad ka Ministry of Defence.
U Myntri ula ong ruh ba ka jingiakren ka dang ïaid mynta bad u Myntri Rangbah ka Jylla khnang ban tei noh da ka skywalk naduh Barik sha Secretariat bad na Barik sha Lachumiere.

“Kane kan iarap ym tang ba weng ïa ka jingkhapngiah hynrei kan pynitynnad ruh ïa ka Nongbah Shillong” ula ong haba bynrap ba ka skywalk kan pynshlur ruh ïa ki paidbah ba kin ïaid kjat na ka bynta ka koit ka khiah jong ki hi.
Kat kum ka jingong jong u, ka Sorkar kala tyrwa ruh ban tei noh da ka Parking Lot ha ka jaka jong ka Tnad PWD ba don ha Barik. “Ngi dang pyrshang ban wanrah ïa baroh ki project hapoh ka Smart City Project” ong u Bah Hamlet.