Ha shong bindi hyniew snem u nongbat bor ia ka ‘thei samla ryngkat bad ka kuna ba 20,000 tyngka

May 15, 2019 0 By Lurphira Lurphira

Shillong, Jymmang 15, 2019 : Ka don kawei ka senten kaba ong ha ka ktien Phareng, “Law will take its own course”. Lah ban buh ha ka ktien Khai kumne, “Ka ain ka don la ka jong ka pali”. Hynrei, ka jingmut bashisha jong ka, ka long, ba uno uno lane kano kano ka nongleh bakla ne nongpynkhein ain, ki hap ha ka jingsajia bad ka kune. Kane ka senten ka iahap eh bad kawei ka mukotduma hapdeng uwei u briew uba la bat bor ia kawei ka samla kaba dang 16 snem ka rta. Kane ka la jia ha ka 2 tarik u Risaw, 2008, ha kaba uwei u briew u la batbor ia kawei ka khynnah samla kaba don 16 snem ka rta, hadien ba u la rah bor ia ka da ka kali shuwa ban leh ia kata ka kam jyrsieh ia ka longrynnieng jong kata ka kynthei ha Phodkynthei ha West Khasi Hills District.

Ki bahaiing hasem jong kane ka khynnah ki la ai mukotduma ia uta u briew bad mynta ka taiew ka Iing Bishar Session Judge ka West Khasi Hills District, ka la rai pynrem ia uta u briew, uba kyrteng u Aboriginal Byrsat (44 snem ka rta) ba u la leh beijot ia kata ka ‘thei samla. Kane ka jingai rai jong ka Iing Bishar ka la shim por khyndiat, hynrei ka la urlongdie por ban ai ia ka hok jong kata ka ‘thei samla bad ban pynurlong katei ka senten ba ka ain ka don la ka la pali bad u nongpynkhein ain un hap ha ka jingshah pynsajia bad jingdain kune.