Ai kali lai shaka u Myntri Rangbah Conrad K. Sangma ia u bah Justi P. Ryntathiang Mawblei badudna dkhot met

September 27, 2021 0 By Lurphira Lurphira

Shillong September,27,2021 (LP) U Myntri Rangbah ka Meghalaya, u Conrad K. Sangma mynta ka sngi u la ai kawei ka kali lai-shaka ia u Bah Justi P. Ryntathiang, uba duna dkhot met uba na ka shnong Mawblei jong ka Mairan Civil Sub-Division. U Myntri Rangbah u la ai ia kane ka kali ha ka prokram ba la pynlong ha Secretariat, Shillong. Ka jingai ia kane ka kali, ka long kum ka jingpynshlur ia une u rangbah uba trei la ka jong ka kam hapdeng kine ki jingeh bad dieng-pyngkiang kiba khang lad ia u. Kane ka jingai kali lai shaka, ka long ruh namarba une u ioh ia ka Entrepreneurship Award.Haba kren ha kane ka prokram, u Myntri Rangbah u la ong ba ka Sorkar jong u ka pynshlur ia ki nongshong jong ka jylla ba kin trei bad ki seng ia la ki jong ki kam ki jam.

Na ka liang jong u Justi P. Ryntathiang u la ong ba ka jingai jong ka Sorkar kane ka kali, kan iarap ban pynsuk bad kham pynsted ia ki jingtrei jong u.

Pynrem Ka Sur Eh Rngiew Ki Nongsohra ba shim ki pulit ia ka jingim u Bah C. Thangkhiew

Shillong September,27,2021 (LP) Ki nongkyrshan jong ka Sur Eh Rngiew Ki Nongsohra ha kane ka lah Sngi Saitjain ki la pynlong ia ka jingialang ha Sohra bad pynrem jur ia ki pulit kiba don kti ha kaba shim ia ka jingim jong u dkhot barih jong ka seng Hynniewtrep National Liberation Council, u Bah C. Thangkhiew. Ki nongkren ha katei ka sngi, ki la pynsngew ba ka Sorkar ka dei ban suspon ia kite ki heh pulit kiba la don kti ban shim ia ka jingim u Bah Thangkhiew uba la wan phai ban iasnoh bad ka imlang sahlang ha ka 13 tarik u Nailar mynta ka sngi.

Kyntu ka Federation of All School Teachers of Meghalaya ia u Myntri Rangbah Conrad K. Sangma ban kyntiew kyrdan noh ia ki skul Ad Hoc sha ka kyrdan Deficit

Shillong September,27,2021 (LP) :Ka Federation of All School Teachers of Meghalaya mynta ka sngi ka la ia kynduh u Myntri Rangbah Conrad K. Sangma bad kyntu ia u ban kyntiew kyrdan noh ia ki skul Ad Hoc sha ka kyrdan Deficit. Haba kren ha ki nongthoh kot khubor, u President ka seng, u Bah Keneth Shadap u la ong ba ka jingiakynduh jong ka seng bad u Myntri Rangbah ka long kaba sngewtynnad. Une u nongialang u la iathuh ba don bun skul Ad Hok kiba la ai ia ki jingshakri jong ki mynta la palat 25 snem bad ka Sorkar ka dei ban kyntiew noh ia ki sha ka kyrdan skul Deficit.